عشرة الفايسبوك كلمات الشاعر الزجال محمد زرواني

عشرة الفايسبوك

شحال منهم في الفايسبوك 
ايعجبوك ف النظرة

بعد تدخل ...
ؤ ديرهم  هل ؤ عشران *^*
...ايلبسوك  غبرة

ايبانو لابسين عمامة خضرة
ايشمتوك ؤ هوما ... ما يسواو  بصلة

هدا حال لمخبي فيه
كان راجل ولا مرا

ؤ شحال من واحد
مكسي بيه دايرو عنوة

انت أظنو علام لابس سلهام
ؤ هو امحلس بحلاس بغلة

ايدير راسو طالب قاري اللوح
ؤ حتى إلا نوى ايصلي ما يتوضأ

ايشد التسبيح بالقول الزين يهديك امحبة
ؤ ف ظهرك إيساوي بالبيع والشرا

ايعجبك بالقول التقيل 
ؤ هو دميم اقليل عفة أسوامو ركلة

عند حاجتو ايسنتل كي لكليب
ؤ عينو منك عوجة

وسط الجماعة بالنفاق مكسي
ينغز عليك بغمزة

لا ثيقة فيه سرو 
المنغاز مع التكيم والدبزة 

وشحال من واحد ايدخلك 
كي النعاس ؤ لمزاح دايرو عنوة

كل كمارة ف لون حتى من النسا
فيهم بنت لجواد لميصلة
ؤ لي كرطيطة مدزوزة و محسنة

فيهم لي بالسالف حرير
ؤ فيهم لي امشعككة ركطة 

فيهم لي غزال ف العين ترعى
ؤ فيهم لي خامدة ف الغار كي اللفعة
اتقلب فين تسيب سمها

وشحال من وحدة لعيبها ساترة
ما ترضا ما تسترضا

وشحال من وحدة مغطية بحجاب الحشمة
ؤ ف الخفا دايرة لفعايل الزرقة

ولي تبان غابرة 
عرفها بين الجموع أمقصرة

قلالة النية  ما بقات ثيقة
لا ف راجل ولا مرا

الحاصول ؤ ما فيه ...
هاد الفايسبوك ما بقات فيه عشرة

بقلم الزجال : محمد زرواني 
                   الطير الحر